Joan Cicchiello, 67 ára hjúkrunarfræðingur frá Pennsylvaníuríki, var á dögunum dæmd til sex ára fangelsisvistar fyrir stórfelld fjársvik. Hún var sakfelld fyrir að hafa svikið tugi milljóna út úr Medicare, sjúkratryggingakerfinu í Bandaríkjunum en gróðann nýtti hún meðal annars í ferðalög um heiminn.

Joan rak sína eigin stofu sem veitti meðferðir og ráðgjöf á sviði geðheilbrigðisþjónustu og var fyrirtæki hennar, Twilight Beginnings, með fasta samninga við fjölmörg hjúkrunarheimili vítt og breitt um fylkið auk þess sem það þjónustaði einstaklinga á heimilum þeirra.

Brot hennar fólust í því að hún réð til sín starfsfólk sem hafði annaðhvort ófullnægjandi eða þá engin leyfi sem heilbrigðisstarfsmenn og útbjó fyrir þau fölsuð vottorð. Meðal starfsmanna voru kírópraktor á eftirlaunum og dæmdur glæpamaður sem áður starfaði sem félagsráðgjafi en var sviptur leyfinu vegna fíkniefnabrota.

Þrátt fyrir að starfsfólkið hefði enga þjálfun né réttindi til að starfa á geðsviði þá sendi Joan þau vítt og breytt um fylkið þar sem þau sinntu eldra fólki sem „ráðgjafar“ á hjúkrunarheimilum, og einnig lét hún starfsfólkið sinna yngra fólki sem leitaði á stofuna. Því næst sendi hún beiðni um endurgreiðslu vegna „þjónustunnar“ til Medicare.

Jafnframt taldi hún Medicare stofnunni trú um að hún sjálf væri að veita skjólstæðingum sínum þjónustu á meðan raunin var sú að hún var í fríi út um allan heim, meðal annars í Las Vegas, Rússlandi, Bretlandi og síðast en ekki síst á Íslandi. Á meðan fékk hún starfsfólk sitt til þess að falsa skýrslur sjúklinga svo það liti út fyrir að hún hefði veitt þeim þjónustu.

Fyrir dómi voru brot Joan sögð vera viðurstyggileg, enda beindust þau að öldrum og fötluðum einstaklingum.