Birgitta Jónsdóttir, einn stofnenda Pírata og fyrrverandi þingmaður, segist ekki ætla að kjósa sinn gamla flokk í komandi borgarstjórnarkosningum. Hún segist ætla að kjósa Sósíalistaflokkinn og tilkynnir það innan Facebook-hóps flokksins.
„Ég hef ákveðið að kjósa ykkur í þetta sinn. Ástæða þess er að ég vil að þið komist að borðinu og getið fundið leið til að virkja hið stóra og fjölbreytta bakland sem nú þegar er til staðar og hefur verið virkjað ótrúlega hratt og vel hjá ykkur. Ég geri engar aðrar væntingar en þær að þið nýtið ykkur alla þá þekkingu og kraft sem er að vakna og gefið öllu þessu fólki verkfæri til að fá að beita sér af fullum krafti,“ segir Birgitta.