Dóra Björt Guðjónsdóttir, oddviti Pírata í Reykjavík, var á Beinni línu DV fyrr í dag. Lesendur DV sendu inn fjölmargar spurningar sem Dóra reyndi að svara. Ein spurninganna sneri að skipun starfshópa í Reykjavík. Vísaði spurningin til aðsendrar greinar Eyþórs Arnalds í Morgunblaðinu í febrúar síðastliðnum þar sem hann benti á að Reykjavíkurborg hefði skipað 351 starfshóp frá kosningum, eða einn starfshópur þriðja hvern dag. Sagði Eyþór að allir þessir starfshópar hafi ekki verið samhentir í umfjöllun sinni og stefnu sem og dæmi um hvernig núverandi meirihluti, sem Píratar eru hluti af, hafi misst tökin á stjórnsýslunni.
Dóra segir þetta ekki rétt: „Ég vil benda á það, af því að stundum er Eyþór að tala um eins og það sé rosalega vont að skipa starfshópa, ég vil benda á að þegar maður er að stjórna 9 þúsund manna vinnustað þá getur verið mjög góð hugmynd að skipa starfshópa. Vegna þess að það er mjög ópraktískt þegar maður er að leysa eitt verkefni að fá 9 þúsund manns í það verkefni. Þannig að stundum, ef maður er sniðugur stjórnandi sem kann skipulag, segir maður „Hey, þið fjögur, þið bara reddið þessu“. Það sparar líka peninga.“