Aðstandendur Netflix-þáttaraðarinnar Religion of Sports eru væntanlegir til Íslands í júní næstkomandi þar sem skotinn verður þáttur um knattspyrnumanninn Ingólf Sigurðsson.
Tom Brady, leikstjórnandi New England Patriots í bandarísku NFL-deildinni, er einn af þremur framleiðendum þáttanna auk þeirra Michael Strahan og Gotham Chopra.
Derek Doneen leikstýrir þættinum um Ingólf en hann vann til Grand Jury Prizes á Sundance-kvikmyndahátíðinni fyrr á árinu fyrir heimildarmynd sína, Kailash. Doneen og Gotham Chopra unnu einnig að heimildarmyndinni Kobe Bryant’s Muse. Þetta er þriðja sería þáttaraðinnar en hún verður sýnd á sjónvarpsstöðinni Direct TV í Bandaríkjunum í desember og verður í kjölfarið aðgengileg á Netflix.
Ingólfur Sigurðsson þykir einn hæfileikaríkasti fótboltamaður sem Ísland hefur augum litið og mörg af stærstu félögum heims vildu ólm fá hann í sínar raðir. Líf hans tók óvænta stefnu þegar hann greindist með geðsjúkdóminn kvíðaröskun á unglingsaldri sem hafði þær afleiðingar í för með sér að hann gat ekki stundað atvinnumennsku í fótbolta.
Ingólfur lék tvisvar sinnum með Heerenveen í Holland og Lyngby í Danmörku og var lykilmaður í unglingalandsliðum. Ingólfur hefur verið áberandi í umræðunni um geðheilbrigðismál hér á landi. Hann hefur flutt fjölmarga fyrirlestra um málefnið. Þá er Ingólfur höfundur pistilsins Ungir karlmenn sem vilja deyja sem birtist á Vísi í fyrra, en það var þriðji mest lesni pistill vefsins árið 2017.
Ingólfur hefur undanfarin ár leikið í næstefstu deild á Íslandi og var í stóru hlutverki þegar Víkingur Ólafsvík sló stigamet þar sumarið 2015. Ingólfur er nú spilandi þjálfari hjá KH í 3. deild