„Niðurstaða atkvæðagreiðslunnar í borgarstjórn sýnir að þá flokka sem þar eiga fulltrúa skortir af einhverjum ástæðum kjark til að taka á málinu,“ segir Sveinbjörg Birna Sveinbjörnsdóttir, oddviti Borgarinnar okkar – Reykjavík.
Sveinbjörg skrifar grein í Morgunblaðið í dag þar sem hún viðrar enn einu sinni þá hugmynd sína að nemendum verði bannað að nota snjallsíma í skólum borgarinnar. Sveinbjörg lagði í vetur fram tillögu í borgarstjórn um að banna notkun snjallsíma, en eins og bent er á í byrjun greinarinnar var tillagan felld með fjórtán atkvæðum gegn einu.
Sveinbjörg er ekki af baki dottin og virðist eitt af baráttumálum hennar, nái hún kjöri í komandi borgarstjórnarkosningum, vera að banna snjallsímana.
„Við þekkjum flest hve notkun snjallsíma getur verið ávanabindandi. Snjallsímar hafa ekki minni áhrif á börnin okkar. Þegar skoðuð eru áhrif snjallsíma á nemendur staðfesta rannsóknir að það nægir að einn nemandi grípi til símans til að kennarinn og aðrir nemendur finni fyrir truflun af þeim sökum. Nýlegar rannsóknir staðfesta jafnframt að áhrifin eru ekki takmörkuð við beina notkun nemenda á símanum heldur nægir að þeir taki símann með sér í skólann. Ástæðan er sú að mörg börn, líkt og fullorðnir, eru ánetjuð því að fylgjast með skilaboðum og myndböndum sem þeim berast í símann. Þau eru því „upptekin“ við að einbeita sér að því að fylgjast ekki með því sem bíður þeirra í símanum,“ segir Sveinbjörg.
Hún segir að tillaga hennar hafi verið felld á sínum tíma, meðal annars vegna þess að sumum fannst hún of víðtæk á meðan aðrir töldu að hún fæli í sér ákveðna forræðishyggju. Með henni væri gripið fram fyrir hendurnar á skólastjórnendum, kennurum og foreldrum. Sjálf er Sveinbjörg þeirrar skoðunar að tillagan sé ekki of víðtæk. „Í mínum huga blasir það einfaldlega við að banna á notkun snjallsíma í skólastofum.“
Sveinbjörg segist hafa átt samtöl við kennara og í þeim hafi þeir staðfest að símarnir trufli kennslu og nemendur séu margir hverjir háðir símunum. „Athyglisbrestur sé sívaxandi vandamál. Kennararnir segja skólastjórnendur vilja taka á málunum, en aftur á móti sé beðið eftir frumkvæði skólayfirvalda.“
Sveinbjörg bendir í lokin á að erlendar kannanir bendi til þess að stór hluti foreldra sé mótfallinn því að börn taki símana með í skólann. Staðreyndin sé sú að foreldrar bíði eftir frumkvæði frá skólayfirvöldum. Hún segir að niðurstaða atkvæðagreiðslunnar þar sem tillagan var felld sýni að þeir flokkar sem eiga fulltrúa í borgarstjórn skorti kjark til að taka á málinu. Heitir hún því tekið verði á málinu nái flokkur hennar kjöri þann 26. maí næstkomandi.
