Dagur B. Eggertsson borgarstjóri mætti á Beina línu DV í dag. Þar fengu lesendur að spyrja hann út í allt milli himins og jarðar, fyrir utan hin ýmsu stefnumál í borginni var Dagur spurður hvort hann væri sáttur við ananas á pizzu. Eins og frægt er orðið þá lýsti Guðni Th. Jóhannesson forseti Íslands því yfir að ananas ætti ekki heima á pizzu og rötuðu þau ummæli í heimsfréttirnar.
Dagur er ekki á sama máli og forsetinn:
„Ég ber mikla virðingu fyrir forsetanum, en mér finnst ananas gott á pizzu í vissum blöndum,“ sagði Dagur. Í kjölfarið kom hann með samsetningu á pizzu sem hann sagði alla þurfa að prófa og er líklegt til að enda á matseðli pizzustaða í borginni ef Dagur nær endurkjöri á laugardaginn:
„Pepperoni, gráðaostur og ananas. Prófa það. Það er mjög gott.“
Hann tók þó fram að þetta væri ekki pizza sem hentaði öllum tilefnum, hann þurfi að vera í rétta skapinu.
Aðspurður um pizzu með skinku og ananas sagði Dagur:
„Já, en mér finnst það aðeins of litlaust.“
