Lögreglan á Suðurlandi greinir frá því að parið sem varð fyrir slysi í Villingavatni, við Þingvallavatn, í gær sé látið. Lögregla segir að tilraunir til endurlífgunar karls og konu, á fimmtugsaldri, frá Bandaríkjunum, hafi ekki borið árangur.
Þau voru úrskurðuð látin í gærkvöldi. Að ósk aðstandenda verða nöfn þeirra ekki birt. Í gær barst lögreglu tilkynningu frá hópi erlendra ferðamanna við vatnið. Þá hafði ferðamaður fallið í vatnið en annar reyndi að aðstoða hann og örmagnaðist á sundi.
Rannsóknardeild lögreglunnar á Suðurlandi og tæknideild lögreglunnar á höfuðborgarsvæðinu annast rannsókn slyssins. „Lögreglan á Suðurlandi þakkar öllum sem að málinu komu af einlægni fyrir þeirra framlag,“ segir í tilkynningu.