Guðlaugur Þór Þórðarson utanríkisráðherra minnist móður sinnar, Sonju Guðlaugsdóttur, í hjartnæmri stöðufærslu sem hann birtir á Facebook. Sonja lést síðastliðið fimmtudagskvöld en hún var 81 árs.
„Elskuleg móðir mín kvaddi þetta jarðlíf seint á fimmtudagskvöldið. Hún var kletturinn, fyrirmynd mín í lífinu. Alltaf til staðar, ást hennar og umhyggja áttu sér ekki takmörk,“ segir Guðlaugur Þór.
Hann segist hafa varið hvítasunnuhelginni í faðmi fjölskyldu sinnar: „Hvítasunnan hefur verið nýtt með pabba og fjölskyldunni til að syrgja og safna kröftum. Ég biðst velvirðingar á að hafa ekki svarað þeim fallegu skilaboðum sem borist hafa en þau eru mikill styrkur. Lífið heldur áfram og eftir standa fallegar minningar um yndislega manneskju, móðir og ömmu. Útförin fer fram 2. júní í Borgarneskirkju. Guð blessi ykkur öll.“
