Tommy Robinson, stofnandi English Defense League, átti að halda erindi hérna á Íslandi í vikunni. Vakur, Samtök um evrópska menningu, stóðu fyrir ráðstefnunni sem var með yfirskriftinni Fjölmenningin í Evrópu: Vandamál og lausnir. Upp kom því miður stórt vandamál þar sem Tommy kom aldrei til landsins. Missti hann af fyrsta fluginu þegar dekk sprakk á bílnum hans og missti svo að seinna fluginu vegna látins ættingja að sögn Sigurfreys Jónassonar. „Hann hlakkaði svo til að koma hingað, ég bara skil þetta ekki.“
Margir gáfu fjármuni til þess að ráðstefnan gæti átt sér stað. „Einn lagði 130.000 krónur og annar lagði inn 150.000 krónur, en meirihlutinn var þúsundkallar hérna og þarna.“
„Ég byrjaði að undirbúa komu hans í febrúar og er búinn að leggja mikla vinnu í þessa ráðstefnu,“ segir Sigurfreyr. Að hans sögn var kostnaður yfir ein milljón króna. „Salurinn kostaði 314.000 krónur og borguðum við 150.000 krónur fyrir 3 öryggisverði sem eru með 20 ára reynslu, þeir hafa meðal annars gætt Justin Timberlake.“ Augljóst var að Sigurfreyr var ósáttur við hvernig þetta endaði þar sem hann var búinn að leggja mikla vinnu í þessa ráðstefnu.
Gústaf Adolf Níelsson kom sérstaklega til landsins til að vera með inngangsræðu á ráðstefnunni. Blaðamaður DV náði tali af honum og þótti honum þetta leiðinlegt að þetta hafi farið svona vegna fjarveru Tommy. „Ég gat nú alveg notað ferðina í eitthvað. Ég ætlaði til dæmis að líta til tannlæknisins míns.“
