Píratar í Kópavogi gera alvarlegar athugasemdir við að ekki hafi verið gert ráð fyrir leiktækjum með aðgengi fyrir öll börn þegar endurhönnun á skólalóð Snælandsskóla stóð yfir. Flokkurinn sendi frá sér yfirlýsingu í kjölfar þess að móðir tveggja drengja við skólann, sjö og átta ára, sem nota hjólstól vakti athygli á þessari staðreynd í facebookfærslu. Yfir 20 manns hafa deilt færslunni er þetta er ritað.

Síðastliðinn fimmtudag var haldinn sérstakur kynningarfundur um endurhönnun á lóðinni. Í kjölfarið birti umrædd móðir opna færslu á facebooksíðu sinni og vakti meðal annars athygli á að í skólanámskrá Snælandsskóla  kæmi fram að skólinn væri án aðgreiningar þar sem nemendur hafa jafnan aðgang að menntun og að „skólastarf mismuni ekki nemendum á grundvelli uppruna, kyns, kynhneigðar, búsetu, stéttar, trúarbragða, heilsufars, fötlunar eða stöðu að öðru leyti.“

Í yfirlýsingu Pírata kemur fram að metnaðarfullt starf eigi sér stað í Snælandsskóla og því komi það sannarlega á óvart að farið hafi verið bæði gegn samþykktri skólastefnu um skóla án aðgreiningar sem og landslögum um þjónustu við fatlað fólk þegar farið var í umfangsmikla endurhönnun á lóð skólans. Sem dæmi um hvernig þetta snýr við fötluðum börnum við Snælandsskóla þá geta börn í hjólastól komist að kastalanum á lóðinni en ekki lengra og þurfa því að sitja í sínum hjólastól og horfa á vini sína leika sér.

„Píratar í Kópavogi fordæma þessi vinnubrögð þar sem verið er að útiloka fatlaða nemendur frá því að gera tekið þátt og leikið við vini sína í frímínútum. Greinilegt er að skólanámsskrá Snælandsskóla er aðeins í orði en ekki á borði.“

Bent er á að í námsskránni Snælandsskóla segir meðal annars:

„Skólastarfið einkennis af virðingu fyrir rétti allra nemenda til virkrar þátttöku í námssamfélagi skólans óháð atgervi þeirra eða stöðu.“ og „Borin er virðing fyrir fjölbreytileika og mismunandi þörfum, hæfileikum og einkennum nemenda og leggja skal áherslu á að útrýma öllum gerðum mismununar og aðgreiningar í skólum.“

Þá segja Píratar „hjákátlegt“ að taka fram í námsskrá að „nemendum sé kennt að greina aðstæður sem leiða til mismununar sumra og forréttinda annarra“ þegar skólinn sjálfur mismuni börnum og skerðir fatlaðra barna við skólann.

„Í nýjum lögum um þjónustu við fatlað fólk kemur fram: „Þá skulu fötluð börn hafa raunverulegan aðgang að og njóta menntunar, þjálfunar, starfsundirbúnings og tómstunda.“Þetta er þverbrotið við endurhönnun skólalóðar Snælandsskóla,“

segir jafnframt í yfirlýsingunni og á öðrum stað segir að hér hafi samráði verið stórkostlega ábótavant.

„Synir móðurinnar sem vakti athygli á þessum samráðsskorti hafa verið í Sælandsskóla síðan þeir hófu grunnskólanám. Það er því afar sérstakt að skólastjórnendur ákveði ekki aðeins að fara gegn stefnu skólans og landslögum, heldur einnig að hunsa þarfir og réttindi barna sem þegar eru í skólanum. Við treystum því að Snælandsskóli taki ábendingar móðurinnar alvarlega og endurhanni á ný þannig að mannréttindi allra barna í skólanum séu virt.“