Steingrímur J. Sigfússon er dýrasti þingmaður landsins ef mið er tekið af upplýsingum á vef Alþingis sem heldur utan um kostnað þingmanna. Steingrímur kostaði rúmar sjö milljónir króna á fyrstu þremur mánuðum ársins og mun því kosta um 28 milljónir króna á ári, að öllu óbreyttu. Guðmundur Ingi Kristinsson, þingmaður Flokks fólksins, er ódýrasti þingmaður landsins, en hann kostaði rúmlega 3,5 milljónir króna yfir sama tímabil. Til samanburðar er meðalkostnaður við alþingismann rúmlega 4,8 milljónir á þessum fyrstu þremur mánuðum. Sigurður Páll Jónsson, þingmaður Miðflokksins, hefur þegið hæstu greiðslurnar fyrir fastan kostnað og Þorgerður Katrín Gunnarsdóttir, formaður Viðreisnar, er með hæsta reikninginn fyrir síma og net. Þá eyðir Alþingi mest í ferðalög utanlands fyrir Rósu Björk Brynjólfsdóttur, þingkonu VG, og Albertína Friðbjörg Elíasdóttir, þingkona Samfylkingarinnar, eyðir mest í ferðalög innanlands.
Nýr vefur um kostnað alþingismanna var opnaður um miðjan mars á þessu ári. Þar má finna upplýsingar um laun og ýmsan kostnað í tengslum við þá einstaklinga sem eiga sæti á Alþingi. Þegar þessi orð eru skrifuð hafa upplýsingar birst fyrir fyrstu þrjá mánuði ársins. Markmiðið er að þann 25. hvers mánaðar muni upplýsingar fyrir undangenginn mánuð birtast. Þá er á döfinni að birta upplýsingar vegna kostnaðar þingmanna allt að áratug aftur í tímann.
Rétt er að taka fram að á vefnum birtast aðeins greiðslur sem berast frá Alþingi. Kostnaður sem fellur til í ráðuneytum er ekki birtur og því er ýmis kostnaður við ráðherra landsins hulinn, meðal annars símakostnaður og kostnaður við ferðalög.
Dýrustu þingmennirnir:
Steingrímur J. Sigfússon – 7.050.445
Sem forseti Alþingis er Steingrímur með ráðherralaun, eða 1,8 milljónir á mánuði og tæplega 5,5 milljónir yfir þrjá mánuði. Þá þiggur hann 522 þúsund krónur í fastan kostnað og hefur ferðast innan- og utanlands fyrir rúma 1 milljón króna. Kostnaður við síma og net er aðeins um 35 þúsund krónur.
Logi Einarsson – 6.745.888
Formaður Samfylkingar þiggur 1,65 milljónir króna á mánuði í laun, eða um 5 milljónir á þremur mánuðum. Þá fær hann greiddan fastan kostnað upp á um 773 þúsund krónur og hefur ferðast innan- og utanlands fyrir rúma 1 milljón. Engir reikningar fyrir síma eða net eru bókaðir á Loga.
Ásmundur Einar Daðason – 6.344.659
Mestu munar um að Ásmundur Einar þiggur um 1,8 milljónir á mánuði í ráðherralaun auk þess sem hann hefur þegið tæplega 600 þúsund krónur í fastan kostnað og ferðast innanlands fyrir um 250 þúsund krónur. Annar kostnaður, meðal annars við utanlandsferðir, síma og net, liggur ekki fyrir hjá ráðherrum. Það má því gera ráð fyrir því að Ásmundur Einar hefði gert atlögu að efsta sætinu ef sá kostnaður væri gefinn upp.
Næstir á lista:
Ódýrustu þingmennirnir:
Guðmundur Ingi Kristinsson – 3.546.982
Guðmundur Ingi frá Flokki fólksins er ódýrasti þingmaður þjóðarinnar fyrstu þrjá mánuði ársins. Auk launa upp á 3,3 milljónir á þessu tímabili hefur hann þegið 210 þúsund krónur í fastar greiðslur auk 33.400 krónur í síma- og netkostnað.
Næstir á eftir:
Andrés Ingi Jónsson, VG, – 3.604.343
Björn Leví Gunnarsson, Píratar – 3.612.728
Jón Steindór Valdimarsson, Viðreisn – 3.684.500
Helgi Hrafn Gunnarsson, Píratar – 3.705.313
Sigurður Páll Jónsson, Miðflokkur – 880.203
Sigurður Páll Jónsson, þingmaður Miðflokksins, þiggur hæsta fasta kostnaðinn af öllum þingmönnum. Hann hefur þegið 670 þúsund krónur í húsnæðis- og dvalarkostnað, 90 þúsund krónur í fastan ferðakostnað í kjördæminu og 120 þúsund krónur í fastan starfskostnað.
Logi Einarsson, Samfylking – 772.987
Albertína Friðbjörg Elíasdóttir, Samfylking, – 768.227
Lægsta fasta kostnaðinn þiggja Þorgerður Katrín Gunnarsdóttir, Andrés Ingi Jónsson og Ólafur Ísleifsson, eða 90 þúsund krónur á mann.
Hæsti kostnaðurinn við ferðalög innanlands:
Bjarkey Olsen Gunnarsdóttir, VG – 1.239.261
Bjarkey Olsen er sá þingmaður sem hefur eytt mestu í ferðalög innanlands fyrstu þrjá mánuði ársins. Alls hefur Alþingi greitt 684.783 krónur fyrir bílaleigubíla handa henni. Þá hefur hún greitt 510.232 krónur fyrir flugferðir innanlands og 44.246 þúsund krónur fyrir gisti- og fæðiskostnað.
Skammt á hæla henni er Þórunn Egilsdóttir frá Framsóknarflokknum. Alls hefur hún eytt 1.234.719 krónum í ferðalög innanlands.
Ferðakostnaður utanlands:
Rósa Björk Brynjólfsdóttir, VG – 864.116
Áslaug Arna Sigurbjörnsdóttir – 699.020
Rósa Björk og Áslaug Arna hafa eytt mest í ferðir erlendis á fyrstu þremur mánuðum ársins. Ástæðan fyrir því er seta þeirra í utanríkismálanefnd. Áslaug Arna er formaður nefndarinnar en Rósa Björk varaformaður.
Kostnaður við síma og net:
Þorgerður Katrín Gunnarsdóttir – 312.145 kr.
Formaður Viðreisnar ber höfuð og herðar yfir aðra þingmenn þegar kemur að kostnaði við síma og net. Alls hefur hún eytt um 104 þúsund krónum á mánuði það sem af er ári.
Lilja Rafney Magnúsdóttir, VG – 173.981 kr.
Þorsteinn Sæmundsson, Miðflokkurinn – 116.085
Meðalkostnaður þeirra 43 þingmanna sem hafa fengið greiðslur fyrir síma og net er 53.219 krónur, eða tæplega 18 þúsund krónur á mánuði.