Bandaríska lyfjaeftirlitið, FDA, hefur heimilað notkun nýs lyfs gegn krónísku mígreni. Lyfinu, sem heitir Aimovig, er sprautað undir húð sjúklinga einu sinni í mánuði. Reiknað er með að Aimovig sé fyrsta lyfið í röð lyfja með langtímavirkni gegn mígreni. Á næsta ári er reiknað með að þrjú lyf til viðbótar verði leyfð og unnið er að þróun fleiri lyfja.

Aimovig er sprautað undir húð sjúklinga einu sinni í mánuði. Árlegur kostnaður við notkun þess er um 6.900 dollarar. Það eru Amgen, sem er í Kaliforníu, og svissneski lyfjarisinn Novartis AG sem hafa þróað lyfið.

Hjá sjúklingum, sem tóku þátt í tilraunum með lyfið, fækkaði mígreniköstum að meðaltali úr átta á mánuði í fjögur. Hópur fólks fékk lyfleysu í tilraununum og hjá þeim fækkaði mígreniköstunum að meðaltali um tvö á mánuði. Hjá sumum sjúklinganna hurfu mígreniköstin algjörlega.

Ekki hafa verið gerðar tilraunir á áhrifum Aimovig ef það er notað í langan tíma.