Að kvöldi 31. mars síðastliðinn voru tvær 14 ára vinkonur staddar í verslunarmiðstöðinni Broen Shopping í Esbjerg í Danmörku. Önnur þeirra þurfti að fara á salernið og fylgdust vinkonurnar að þangað. Önnur beið fyrir utan en hin fór inn á salernið. Þegar þangað kom biðu tveir Afganar þar og réðust á hana og nauðguðu. Þeir reyndu síðan að nauðga vinkonunni.

Afganirnir voru handteknir skömmu síðar og hafa setið í gæsluvarðhaldi síðan. Annar þeirra er tvítugur en hinn 16 ára. JydskeVestkysten skýrði frá málinu á sunnudaginn.

Talsmaður lögreglunnar staðfesti við Ekstra Bladet að tveir afganskir ríkisborgarar sitji í gæsluvarðhaldi vegna málsins. Hann sagði að lögreglan hafi ákveðið að skýra ekki frá málinu af tillitssemi við stúlkurnar tvær og geti auk þess ekki skýrt nánar frá málavöxtum þar sem gæsluvarðhaldsúrskurðirnir hafi verið kveðnir upp fyrir luktum dyrum og því megi ekki fjalla um það sem kom fram fyrir dómi.