Aðeins átta prósent jarðarbúa eru búsett í Rómönsku Ameríku en samt sem áður eru 33 prósent morða í heiminum framin þar. Frá árinu 2000 er talið að 2,5 milljónir manna hafi verið myrtar á þessu svæði sem afmarkast af löndum Suður-, Mið- og Norður-Ameríku sunnan landamæra Bandaríkjanna þar sem rómönsk tungumál eru opinber tungumál.
Þetta kemur fram í óhugnanlegri skýrslu Igarapé Institute, hugveitu í Brasilíu sem lætur þróunar- og öryggismál sig varða. Breska blaðið Guardian fjallaði um efni skýrslunnar.
Talið er að fjórðungur allra morða í heiminum séu framin í aðeins fjórum löndum í Rómönsku-Ameríku; hér er um að ræða Brasilíu, Kólumbíu, Mexíkó og Venesúela.
Í skýrslunni er varpað ljósi á morðtíðni sem fer hækkandi ár frá ári og þá staðreynd að minna fé er varið í löggæslu. Í skýrslunni er því spáð að morðum muni halda áfram að fjölga í þessum heimshluta að minnsta kosti til ársins 2030.
Á heimsvísu hefur tilhneigingin verið sú að morðum sé að fækka en raunin er ekki sú í Rómönsku-Ameríku. Aðeins þar og á stríðssvæðum, til dæmis í Mið-Austurlöndum, og á svæðum í suður- og miðhluta Afríku hefur tíðnin aukist.
Í skýrslunni kemur fram að um helmingur fórnarlambanna sé ungt fólk í blóma lífsins, einstaklingar á aldrinum 15 til 29 ára. Þá kemur einnig fram að langflestum sé banað með skotvopnum, eða 75 prósentum þeirra sem drepnir eru. Á heimsvísu er þetta meðaltal 40 prósent.