Í mars mánuði fækkaði tilkynningum um þjófnaði miðað við meðalfjölda síðustu sex og síðust 12 mánuði á undan. Þar af fækkaði innbrotum hlutfallslega mest.
Þetta kemur fram í skýrslu yfir afbrotatölfræði lögreglustjórans á höfuðborgarsvæðinu fyrir marsmánuð 2018. Í skýrslunni eru teknar saman upplýsingar um helstu afbrot sem hafa verið tilkynnt til lögreglu.
Fram kemur að tilkynningar um innbrot í heimahús hafi verið 48 prósent færri en í mánuðinum á undan.
Í mars voru 23 þjófnaðir á reiðhjólum tilkynntir til lögreglu. Nú þegar sólin fer hækkandi, sumarið nálgast og reiðhjólum fjölgar á götum borgarinnar er vert að minna eigendur reiðhjóla á að vera á varðbergi og ganga tryggilega frá reiðhjólum sínum.
Þá var þónokkur fjölgun var á fíkniefnamálum sem upp komu í embættinu í mars auk þess sem fleiri umferðarlagabrot voru skráð, en ekki hafa fleiri umferðarlagabrot verið skráð í einum mánuði á höfuðborgarsvæðinu síðan í janúar 2016.
Sektir fyrir umferðarlagabrot hækka um næstu mánaðamót, til að mynda mun sekt fyrir að nota farsíma við stýrið án handfrjáls búnaðar hækka úr 5.000 kr. í 40.000 kr. og sektin fyrir hvert nagladekk hækkar úr 5.000 í 20.000.
