Býflugur eiga á brattann að sækja hér á jörðinni og hefur okkur mönnunum tekist vel upp við að fækka þeim, þótt óviljandi sé, með lifnaðarháttum okkar. En býflugurnar okkar eru fyrirmynd vísindamanna frá Japan og Bandaríkjunum sem vinna nú að gerð vélbýflugna sem þeir hyggjast nota á Mars.
Digital Trends skýrir frá þessu. Fram kemur að vélbýflugurnar verði á stærð við býflugu og með vængi eins og engispretta. Þessi undarlegu stærðarhlutföll líkamans og vængjanna myndu ekki virka hér á jörðinni en í þunnu andrúmslofti Mars er staðan allt önnur eða það vona vísindamennirnir.
Markmiðið með að nota vélbýflugur á Mars er að komast yfir stærri svæði til að kanna plánetuna betur.
Það er þó vissara að taka hinum væntanlegu vélbýflugum og fréttum af þeim af yfirvegun þar sem verkefnið er ekki enn komið mjög langt áleiðis en þó eru tilraunir hafnar í sérstöku rými þar sem líkt er eftir andrúmsloftinu á Mars.
