Háskólinn er með starfsstöðvar víða um land og ein af þeim er á Keldnaholti í Reykjavík þar sem áður var Rannsóknastofnun landbúnaðarins. Í vetur festu stjórnendur skólans kaup á rafmagnsbíl fyrir starfsmennina í Keldnaholti og tryggja þurfti að hægt væri að koma honum í hleðslu eftir notkun hvers dags. Það vandamál var hins vegar leyst með því að setja tengil við eina bílastæðið á lóðinni sem merkt er fötluðum og hreyfihömluðum.
Samkvæmt heimildum DV er starfsfólk í Keldnaholti mjög óánægt með þetta fyrirkomulag, sem er nú búið að standa yfir í nokkra mánuði. Margir hafa bent á að ástandið sé óásættanlegt en ekkert breytist. Starfsmaður, sem ekki vill láta nafns síns getið, segir:
„Það er búið að benda á þetta og senda bréf til deildarforseta en ekkert gerist. Maður skilur ekkert í þessu því hérna er stofnun sem á að vera öllum opin. Þetta er galið og búið að vera svona allt of lengi. Það væri svo einfalt að leysa þetta. Annaðhvort með því að færa þennan tengil eða mála annað stæði hérna.“
Starfsfólkið kærir sig ekki um að þurfa að leggja bílnum í stæði hreyfihamlaðra og margir þeirra hafa nú ákveðið að nota frekar eigin bifreiðar í vinnutengdum akstri. Rafmagnsbíll, merktur Landbúnaðarháskólanum, stendur því óhreyfður flesta daga í stæði sem ætti að vera frátekið fyrir hreyfihamlaða.
„Þetta er algjört prinsippmál. Það eru ekki margir sem eiga erindi í þetta hús aðrir en starfsmenn en þegar það gerist þá á þetta stæði að standa autt.“