Einn efnilegasti tónlistarmaður Íslands er Birgir Steinn Stefánsson. Birgir vakti fyrst athygli með hljómsveitinni September en sló síðan eftirminnilega í gegn með laginu „Can you feel it“, sem einmitt var gefið út í septembermánuði 2017. Lagið fór umsvifalaust á topp vinsældalista hérlendis og hefur líka gert það gott úti í hinum stóra heimi. Á þessari stundu hefur lagið verið spilað 7,3 milljón sinnum á Spotify. Það eru hreint út sagt ótrúlegar tölur. Birgir var gestur Brennslunnar á FM957 í vikunni og sagði að velgengnin hefði gert það að verkum að hann hefði verið í mestu vandræðum með að ákveða hvaða lag hann myndi næst gefa út enda mikilvægt að það væri sterkt. Í þættinum var nýjasta lag hans frumflutt en það ber heitið „Home“. Um er að ræða þrælsterkt popplag sem líklegt er til vinsælda.
Birgir Steinn á ekki langt að sækja hæfileikana því faðir hans er tónlistarmaðurinn góðkunni, Stefán Hilmarsson. Þeir feðgar hafa troðið upp saman, sérstaklega í kringum jólavertíðina, og gáfu meðal annars út lagið „Um Vetrarnótt“ fyrir tæpum þremur árum.
