Hjólreiðakappinn Lance Armstrong hefur komist að samkomulagi við bandaríska saksóknara þess efnis að hann greiði fimm milljónir dala, um hálfan milljarð króna, í bætur vegna lyfjahneykslisins sem hann varð uppvís að.
Bandarísk yfirvöld höfðu farið fram á að fá hundrað milljónir dala, rúma tíu milljarða króna, þar sem einn helsti bakhjarl Armstrongs og hjólreiðaliðs hans var US Postal Service um það leyti sem Armstrong notaði frammistöðubætandi efni.
Armstrong, sem sigraðist á krabbameini á sínum tíma, vann Tour De France-hjólreiðakeppnina, eina erfiðustu íþróttakeppni heims, sjö sinnum í röð á árunum 1999 til 2005. Þótti árangur hans undraverður í ljósi veikinda hans áður. En upp komast svik um síðir.
Árið 2011 var hann dæmdur fyrir ólöglega lyfjanotkun og sviptur öllum titlum sem hann hafði unnið auk þess sem hann var dæmdur í ævilangt keppnisbann.
US Postal Service greiddi 31 milljón Bandaríkjadala í styrki til liðsins á árunum 2001 til 2004. Með samkomulaginu falla bandarísk yfirvöld frá kröfu sinni um að hann greiði þessar hundrað milljónir dala.