Ólafur Helgi Kjartansson, lögreglustjóri á Suðurnesjum, segir að yfirlýsing Sindra Þórs Stefánssonar sé bjánaleg og fulla af rangfærslum. Hann segir engar samningsviðræður í gangi líkt og segir í yfirlýsingu. „Það er bara ekki rétt hjá hon­um. Það hefði verið hægt al­veg fram til þessi bjána­lega yf­ir­lýs­ing kom. Þá hefði verið hægt að skoða það að vinna í mál­inu, en það er búið,“ hefur mbl.is eftir honum.

Ólafur Helgi segir ennfremur að það eina sem hann efist ekki um í yfirlýsingunni sé að Sindri myndi brjóta lög aftur. „Hann seg­ist ætla að ger­ast brot­leg­ur og nota fölsuð skil­ríki. Það er hugs­an­lega rétt. Það er eina sem ég get ekki dregið í efa,“ segir Ólafur Helgi.

Líkt og hefur komið fram þá er Sindri eftirlýstur um alla Evrópu í kjölfar þess að hann flúði úr fangelsinu á Sogni aðfaranótt þriðjudags. Hann sagði í yfirlýsingu sinni að honum hafi verið haldið í fangelsi án dóms og laga. Hann fullyrti að hann myndi snúa aftur heim til Íslands en vildi semja um að hann yrði ekki handtekinn erlendis. Ólafur Helgi virðist því hafa slegið þann valmöguleika alfarið af borðinu.