Lögreglan á höfuðborgarsvæðinu segir að karlmaður á sextugsaldri hafi fundist látinn í sjónum norðan við Vatnagarða í Reykjavík á sjötta tímanum í morgun.
Farið var að óttast um afdrif mannsins eftir að bátur hans fannst mannlaus neðan við athafnasvæði Samskipa í Kjalarvogi eftir klukkan eitt í nótt.
„Þá þegar hófst víðtæk leit að manninum, sem lauk svo á sjötta tímanum eins og áður sagði. Ekki er grunur um saknæmt athæfi, en maðurinn var einn á ferð á bátnum. Ekki er hægt að birta nafn hins látna að svo stöddu,“ segir í tilkynningu.
