Á tíunda tímanum í gærkvöldi var tilkynnt til lögreglu að kötturinn Grímkell sæti fastur á lítilli eyju syðst í Reykjavíkurtjörn, nánar tiltekið í Hljómskálagarðinum. Lögreglumenn voru sendir til bjargar. Þegar á vettvang var komið óð einn lögreglumannanna út í Tjörnina en festi sig í drullu og varð að snúa við. Ljóst var að lögreglumenn gætu ekki náð til Grímkels og var því óskað eftir aðstoð frá slökkviliðinu sem brást að sjálfsögðu vel við og sendi menn á vettvang.

Fjórir slökkviliðsmenn komu á vettvang og óð einn út í Tjörnina en festi sig í drullu eins og lögreglumaðurinn. Þá var gripið til þess ráðs að setja stiga yfir á eyjuna til að slökkviliðsmaðurinn kæmist út í hana. Þegar slökkviliðsmaðurinn komst loks að Grímkatli festist hann í drullu en eftir töluverða baráttu náði hann að losa sig og koma Grímkatli óhultum af eyjunni.

Lögreglan segir að Grímkell hafi verið mjög blíður en hafi vælt mikið. Sá sem hafði tilkynnt um hrakfarir Grímkels í upphafi tók við honum og ætlaði að koma honum til síns heima.