Á tólfta tímanum í gærkvöldi var ungur maður, sem var í annarlegu ástandi, handtekinn fyrir að fara ekki að fyrirmælum lögreglu. Hann hafði ítrekað reynt að komast inn í hús en var ekki velkominn þar og höfðu lögreglumenn ítrekað vísað honum frá en alltaf kom maðurinn aftur. Hann var vistaður í fangageymslu.
Skömmu fyrir miðnætti var maður, sem var í annarlegu ástandi, handtekinn í Kópavogi en hann er grunaður um eignaspjöll. Tilkynnt hafði verið að maðurinn væri að brjóta rúður í bifreið og notaði til þess hamar. Maðurinn var vistaður í fangageymslu.
Skömmu eftir miðnætti var tilkynnt um umferðaróhapp á Sæbraut við Laugarnesveg. Þar hafði bifreið verið ekið á kantstein. Engin slys urðu á fólki. Ökumaðurinn er grunaður um að hafa verið undir áhrifum fíkiniefna og með fíkniefni í fórum sínum. Hann var vistaður í fangageymslu.
Þrír ökumenn voru handteknir í nótt, grunaðir um akstur undir áhrifum fíkniefna. Einn þeirra hafði aldrei öðlast ökuréttindi og var með meint fíkniefni í fórum sínum.
Einn ökumaður var handtekinn í gærkvöldi, grunaður um ölvun við akstur.