Walter Moody, 83 ára, var tekinn af lífi í gærkvöldi í Atmore fangelsinu í Alabama með eitursprautu. Hann var úrskuðaður látinn klukkan 20.42 að staðartíma. Moody var dæmdur fyrir morðið á Robert Vance, dómara, en hann sendi honum bréfsprengju 1989.

Moody er elsti maðurinn sem hefur verið tekinn af lífi í Bandaríkjunum síðan dauðarefsing var tekinn upp á nýjan leik á áttunda áratugnum.

Sky-fréttastofan segir að Moody hafi ekki viljað koma með neina lokayfirlýsingu og hafi ekki svarað þegar hann var spurður hvort hann vildi segja eitthvað að lokum.

Þegar réttað var yfir Moody 1996 sagði saksóknari að Moody væri hugleysingi sem hafi framið morð með bréfsprengju því hann hafi viljað koma fram hefndum gegn réttarkerfinu. Moody reyndi að láta líta út fyrir að Ku Klux Klan hafi staðið á bak við bréfsprengjutilræðið.

Lögmenn hans reyndu að koma í veg fyrir aftökuna með því að færa rök fyrir því að aldur Moody og heilbrigðisástand myndu gera framkvæmdina erfiða og flókna. Hæstiréttur Bandaríkjanna tók málið til meðferðar í gær og frestaði aftökunni á meðan en aflétti síðan frestuninni þannig að hægt var að halda ferlinu áfram.

Moody hlaut fyrst dóm 1991 en þá dæmdi alríkisdómstóll hann í sjöfalt lífstíðarfangelsi og 400 ár til viðbótar. Dómstóll í Alabama sakfelldi hann síðar og dæmdi til dauða fyrir morðið á Vance.

Moody hélt alla tíð fram sakleysi sínu.