Að undanförnu hefur sænska lögreglan komið í veg fyrir margar hryðjuverkaárásir í landinu. Hryðjuverkaógnin, sem steðjar að Svíþjóð, er mjög mikil og fær lögreglan um 6.000 ábendingar um hugsanlegar hryðjuverkaárásir í hverjum mánuði. Þetta sagði Klas Friberg yfirmaður sænsku öryggislögreglunnar Säpo í samtali við Expressen.
Hann sagði að stærsta verkefni öryggislögreglunnar þessa dagana sé að tryggja að þingkosningarnar, sem eru fyrirhugaðar 9. september, geti gengið eðlilega fyrir sig. Hann sagði að Rússar séu mjög virkir á tölvusviðinu og séu að undirbúa aðgerðir sem gera þeim kleift að skaða Svía og Svíþjóð ef sú staða kemur upp að þeir telji sig þurfa að gera það.
Friberg sagði einnig að öryggislögreglan hafi aflað upplýsinga frá öðrum ríkjum og sjái að mörg ríki séu áhugasöm um að hafa áhrif á sænsku þingkosningarnar og að hafa áhrif á kjósendur. Í þessu skyni geti verið að tölvuárásir verði gerðar á opinberar stofnanir eða fjölmiðla. Að hans sögn stunda mörg ríki njósnir í Svíþjóð og reyna að komast inn í sænsk tölvukerfi. Svíar standa framarlega í tölvuvæðingu og því er mikill áhugi meðal margra að komast inn í sænsk tölvukerfi til að komast yfir upplýsingar um Svía. Hann benti einnig á að því miður séu öryggismál margra fyrirtækja ekki í nægilega góðu horfi og þar verði fyrirtækin að taka sig á.
Hvað varðar kosningarnar sagði Friberg að hann telji ekki ástæðu fyrir Svía til að hafa áhyggjur. Það sé mat öryggislögreglunnar og kjörstjórnar að kosningakerfið sé öruggt og skilvirkt, það skýrist meðal annars af því að pappír sé mikið notaður í kosningunum.