„Til að komast að skólanum þurfum við að labba sirka 100 til 200 metra á umferðargötunni af því að göngustígurinn við götuna er ekki kominn. Þetta verður vonandi skárra þegar mestu framkvæmdunum í hverfinu er lokið,“ segir Árni Björn Kristjánsson faðir fjögurra ára stúlku sem bundin er hjólastól. Hann gagnrýnir aðgengi fyrir fatlaða í Urriðaholti þar sem fjölskyldan býr en þar hafa talsverðar byggingaframkvæmdir verið að eiga sér stað að undanförnu.
Hátt í 600 manns hafa deilt facebookfærslu Árna en þar birtir hann ljósmynd sem sýnir eiginkonu hans, Guðrúnu Ósk Maríasdóttur, og dóttur þeirra Halldóru þar sem þær standa við tröppur sem verið er að setja upp við hliðina á fjölbýlishúsi fjölskyldunnar. Líkt og sjá má er aðgengi fyrir hjólastóla allt annað en gott og að sögn Árna er þar enginn rampur fyrir hjólastóla. Það er því ekki annað í boði en að fara upp tröppurnar með hjólastólinn.
„Ótrúlega flottar þessar tröppur sem er verið að setja upp hliðina húsinu okkar. Þessar tröppur liggja einmitt að göngustígnum að skólanum sem Halldóra María mun væntanlega fara í. Verður snilld að bera hana upp í hjólastólnum alla morgna. Vel gert Garðabær,“ ritar Árni Björn við myndina, en stígurinn sem um ræðir liggur á milli Holtsvegar 37 og 39.
Árni birtir jafnframt meðfylgjandi mynd sem sýnir leiðina sem fjölskyldan þarf að fara í staðinn. Líkt og sjá má þurfa þau að ganga á götunni þar sem engir göngustígar eru klárir. Til að komast að skólanum þurfa þau að ganga á götunni og þaðan inn á göngustíginn sem liggur að skólanum.
„Stelpan okkar er ennþá svo lítil og er bara nýbúin að fá hjólastól þannig við erum núna fyrst að rekast á svona hindranir sem við tókum ef til vill ekki eftir hér áður fyrr. Þá bara héldum við á henni út um allt. En við höfum heyrt frá öðrum foreldrum að aðgengi sé mjög lélegt á Íslandi miðað við önnur lönd,“ segir Árni í samtali við DV.is en hann kveðst jafnframt hafa gert bænum viðvart um ástandið.