Athafnakonan Margrét Friðriksdóttir fékk heldur kaldar kveðjur fyrr í dag þegar hún spurði innan hóps forritara á Íslandi hvort einhver gæti bent henni á leiðir til að hlaða niður ólöglega ákveðnu forriti. Margrét er afar trúrækin og vísar oft í biblíuna. Það kom í bakið á henni í þetta skiptið því einn forritari benti henni á sjöunda boðorðið. Svo fór að Margrét eyddi innlegginu.
„Er orðið ógerlegt að downloada forritum í dag, vitiði um íslenska download síðu í ætt við piratebay?,“ spurði Margrét. Einn forritari sagði henni strax að þetta væri ekki rétti staðurinn fyrir þessa fyrirspurn. „Þetta er ekki réttur vettvangur, efast um að þú fáir hjálp við að stela hugbúnað inn á síðu fyrir fólk sem lifir á því að smíða hugbúnað,“ sagði sá.
Margrét lét ekki deigan síga og spurði á móti hvar sá vettvangur væri. „Ertu að spyrja hvar er réttur vettvangur til að sækja hugbúnað ólöglega?,“ spurði þá annar forritari. „Já eða spyrjast fyrir hvort þetta sé alveg hætt í dag, var að spyrja að því líka? Þetta var svo auðvelt fyrir ekki svo löngu, er alveg búið að koma í veg fyrir þetta í dag?,“ spurði Margrét.
Þá sagði þriðji forritarinn: „Minnumst sjöunda boðorðsins“. En líkt og flestir vita hljóðar það boðorð svo: „Þú skalt ekki stela.“