Landflótti íslenska fangans Sindra Þórs Stefánssonar hefur vakið athygli erlendra fréttamiðla undanfarin sólarhring. Um er að ræða fréttamiðla í Evrópu og Bandaríkjunum.
„Sakborningur í „Stóra Bitcoin ráninu“ strýkur úr fangelsi“ segir á vef LA Times. Í greininni er vakin athygli á því að engar girðingar eru í kringum fangelsið að Sogni og að fangar hafi þar aðgang að bæði síma og interneti.
Jafnframt er greint frá íslenska strokufanganum á vef BBC News og bandaríska ABC News og sömuleiðis á vef Cointimes og TRT World. Aftonbladet í Noregi gerir málinu sömuleiðis skil.
Þá er greint frá málinu á vef Washington Post og tekur greinarhöfundur fram að á Íslandi sé glæpatíðni með þeim lægstu í heimi. Samkvæmt Ólafi Helga Kjartanssyni lögreglustjóra er Bitcoin ránið umrædda á stærðarskala sem ekki hefur sést áður hér á landi.
Jafnframt bendir höfundur á að Ísland búi yfir endurnýtanlegum orkulindum. Fyrirtæki sem leita að rafmyntum horfa því hýru auga hingað til lands og hefur starfsemi slíkra gagnavera margfaldast undafarin misseri.
Þá er vitnað í ummæli Helga Gunnlaugssonar félagsfræðiprófessors við HÍ. Hann segir vel skipulagða flótta vera fátíða í íslenskum fangelsum.
„Oftast er það þannig að viðkomandi strýkur úr fangelsi til að fara og detta í það. Hér eru undirheimarnir svo fámennir og það er afskaplega erfitt að fara í felur, hvað þá að flýja land.“
Líkt og fram hefur komið strauk Sindri Þór úr gæsluvarðhaldi í fangelsinu að Sogni en hann klifraði út um glugga á einni byggingu fangelsisins. Hann fór í kjölfarið frá landinu til Arlanda flugvallar í Svíþjóð. Fyrir liggur að Sindri ferðaðist á nafni annars manns en myndir úr öryggismyndavélakefi Flugstöðvar Leifs Eiríkssonar staðfesta að Sindri var á ferðinni.
Athygli vakti að Sindri Þór var í sama flugi og Katrín Jakobsdóttir forsætisráðherra en hún flaug til Svíþjóðar til að vera viðstödd leiðtogafund Norðurlandanna og forsætisráðherra Indlands.
Í samstarfi við sænsk lögregluyfirvöld er unnið að því að hafa upp á Sindra og hefur alþjóðleg handtökuskipun verið gefin út.
Í samtali við RÚV segir Gunnar Ólafur Schram, yfirlögregluþjónn hjá lögreglunni á Suðurnesjum að fullvíst sé að Sindri hafi haft vitorðsmenn sem hjálpuðu honum að skipuleggja flóttann.
„Ég tel fullvíst að hann eigi vitorðsmann, eða menn, sem hafi aðstoðað hann að koma sér af Sogni á flugstöðina. Og við ýmsa hluti þar á milli. Þetta er einmitt tímabil sem við erum með til rannsóknar núna.“
