Veitingastaðurinn Bull City Burger í Durham í Norður-Karólínu er þekktur á meðal nágranna fyrir afar framandi matseðil, hvort sem kúnnann langi í andafitufranskar eða saltkringlur með bjórsósu.

Það þykir að vísu ekki vera neitt í samanburði við nýjustu viðbótina, sem er hamborgari borinn fram með risastórri, kafloðinni tarantúlu, saltaðri og ofnbakaðri.

Þessi máltíð spratt upp úr þeirri hugmynd að prófa nýjar, framandi bragðtegundir út mars- og aprílmánuð.

Eigendur staðarins segja þessa máltíð gera gestum bilt við, en að rétturinn sé eftirsóttur engu að síður.

„Fólk segir að þetta bragðist eins og krabbi. Aðrir segja að þetta sé eins og skelfiskur, með örlitlu málmbragði. Hins vegar er það niðurstaða flestra að erfitt sé að líkja bragðinu á fótleggjunum við eitthvað ákveðið. Hver biti er öðruvísi!”