Tveir læknar frá Flórída í Bandaríkjunum hafa stefnt eiganda fyrirtækisins Full Spectrum Nutrition í Colorado Springs fyrir dóm. Læknarnir segja að þeir hafi verið blekktir til að setja 1,1 milljón dollara, sem svarar til rúmlega 100 milljóna íslenskra króna, í fyrirtækið. Læknarnir töldu sig vera að fjárfesta í framleiðslu á kannabíóðaþykkni og tengdum vörum. En peningarnir voru notaðir til að byggja upp griðland fyrir fugla á Kosta Ríka.

Læknarnir halda því fram að þeir hafi verið blekktir og krefjast þess að fá fjárfestingu sína endurgreidda og að auki þrefalda þá upphæð í skaðabætur. Denver Post hefur eftir Craig Brand, lögmanni, að eigandi Full Spectrum Nutrition, John Michael Merritt Jr, sé „klassískur svikahrappur“ sem herji á fólk sem dreymi um að græða milljónir á ört vaxandi marijúanaiðnaðinum.

Kosta Ríka er sannkölluð paradís fyrir dýralíf sagði Brand en tók jafnframt fram að læknarnir hefðu aldrei ætlað að setja peninga í iRescue fuglagriðlandið sem Merritt hefur verið að byggja upp þar. Brand sagði að Merritt hafi lagt vel unna viðskiptaáætlun fyrir læknana og hafi allt bent til að þeir ættu mikinn hagnað í vændum af fjárfestingu sinni.