Inga Sæland, formaður Flokks fólksins, og Björn Arnar Magnússon, framkvæmdastjóri Brynju, hússjóðs Öryrkjabandalagsins, neita að upplýsa hvenær samkomulag milli Ingu og sjóðsins um tvöfalda húsaleigu hennar var handsalað. Inga svarar ekki fyrirspurn DV um málið og það tók blaðið tæpar tvær vikur, þrátt fyrir ítrekaðar tilraunir, að fá viðbrögð frá Birni Arnari. Þegar það tókst loks sagðist framkvæmdastjórinn neita að tjá sig um mál einstakra leigjenda. Aðspurður hverjar verklagsreglurnar væru almennt þegar breytingar yrðu á tekjum eða eignastöðu leigjenda hjá Brynju sagði Björn Arnar: „Það eru engar verklagsreglur til varðandi svona mál enda koma þau aldrei upp.“ Þá sagði hann að samningum yrði ekki þinglýst á eignina eins og gert er með alla aðra leigusamninga félagsins.
Eins og kom fram í frétt DV á dögunum hefur Inga leigt íbúð af Brynju í sjö ár. Íbúðin er skráð fjögurra herbergja og er 148 fermetrar að stærð, þar af 28 fermetra bílskúr. Húsaleigan sem Inga hefur greitt hefur verið afar hagstæð. Samkvæmt þinglýstum leigusamningi var leigan um 110 þúsund krónur á mánuði og var þeim upplýsingum slegið upp í frétt blaðsins. Eins og áður svaraði Inga ekki spurningum blaðsins um málið en nokkrum dögum eftir að fréttin birtist gaf hún út þá yfirlýsingu á Facebook-síðu sinni að leigan væri í raun tvöföld. „Eftir að ég varð þingmaður varð það samkomulag milli mín og Brynju hússjóðs ÖBÍ að á meðan ég starfaði sem slíkur myndi ég greiða 100% hærri húsaleigu þegar ég hefði náð þeim hámarksviðmiðunartekjum sem þeir miða við,“ skrifaði Inga og sagði að samkvæmt heimabanka sínum ætti hún að borga 235.418 krónur í leigu fyrir apríl mánuð. „Já, hann er misjafn skíturinn sem flæðir með allri sinni illgirni,“ bætti Inga við.
Í viðtali við Stöð 2 skömmu síðar sagði Inga að samningurinn hefði verið gerður „fyrir stuttu“ og að hún væri þakklát fyrir þann velvilja sem hússjóðurinn sýndi henni og þeim breyttu aðstæðum sem hún væri í. „Ég get ekki fullþakkað það, þetta er náttúrulega mitt friðhelgi, mitt heimili og eina öryggið sem ég á,“ segir Inga.
Brynja, hússjóður Öryrkjabandalagsins, á og rekur um 860 íbúðir sem leigðar eru út á hagstæðu verði til öryrkja. Eftirspurn eftir húsnæði á vegum félagsins hefur aldrei verið meiri en umsækjendur geta vænst þess að biðtíminn eftir íbúð sé um fjögur ár. Til þess að eiga rétt á einstaklingsíbúð hjá Brynju verða árstekjur umsækjanda að vera undir 4.749.000 króna á ári, sem eru mánaðarlaun upp á rúmlega 395 þúsund krónur á mánuði. Hámarkið fyrir hjón og sambúðarfólk er 6.649.000 krónur á ári, sem eru mánaðarlaun upp á rúmlega 554 þúsund krónur.
Mánaðarlaun Ingu Sæland á Alþingi eru tæplega 1,7 milljónir króna á mánuði auk fastra mánaðarlegra kostnaðargreiðslna upp á 70 þúsund krónur. Það gera árslaun upp á rúmar 20 milljón króna. Laun hennar eru því rúmlega fjórföld hámarksárslaun einstaklinga og tæplega þreföld hámarksárslaun hjóna eða sambúðarfólks sem hefur í hyggju að sækja um íbúð hjá Brynju.
Í áðurnefndu viðtali við Stöð 2 sagði Inga að sjóðurinn hefði horft til þess að ekki væri „alveg þar með sagt að hún væri komin til þess að vera öryrki á ofurlaunum lengi.“ DV myndi gjarnan vilja spyrja Ingu, ef hún svaraði spurningum blaðsins, hvort starfsöryggi hennar sem þingmanns væri virkilega minna en annarra einstaklinga á vinnumarkaði. Kjörtímabilið er fjögur ár og ef þingi yrði slitið fyrr og boðað til kosninga þar sem Inga myndi missa þingsæti sitt þá má ekki gleyma því að hún fengi greidd biðlaun í þrjá til sex mánuði eftir atvikum.