Þegar tyrkneski íkorninn Karamel lenti í gildru í bænum Batman í suðausturhluta landsins leit allt út fyrir að ævi hans væri búin. En dýravinir hjá Aydin háskólanum í Istanbul voru ekki tilbúnir að gefast upp á honum og smíðuðu fyrir hann hjálpartæki til að komast um. Daily Sabah í Tyrklandi greinir frá þessu.

Karamel fannst fastur í gildru sem lögð var fyrir villt dýr í Batman. Hann var með lífsmarki en mjög illa haldinn og framfætur hans kramdir. Farið var með hann til dýralæknis sem gerði sex klukkutíma skurðaðgerð á honum. Það dugði ekki til og Karamel þurfti að gangast aftur undir hnífinn. Niðurstaðan var sú að hann missti báða framfæturnar en var engu að síður hugað líf.

Til að Karamel gæti komist um og borðað varð að smíða handa honum búnað og það tóku vísindamenn og læknar við Aydin háskóla að sér. Tölvuverkfræðingurinn og dýravinurinn Tayfun Demir leiddi verkefnið en með honum störfuðu bæklunarlæknirinn Mustafa Gultekin, læknirinn Tolgay Satana og sjúkraþjálfarinn Eylem Kucuk.

Demir á sjálfur íkorna sem gæludýr en hann bjargaði honum frá veiðimönnum. Ólöglegt er að veiða íkorna í landinu þeir eiga enga möguleika á að matast og sleppa undan rándýrum ef þeir eru bæklaðir.

Vísindamennirnir hönnuðu nokkur konar hólk sem er bundinn utan um búk Karamel með teygju og rennur um á tveimur hjólum. Það tók Karamel þó nokkurn tíma að venjast hjálpartækinu en hann getur nú borðað sjálfur. Gultekin segir:

„Hann er villt dýr sem er að reyna að búa hjá mönnum og hann er með ókunnan hlut fastan við líkama sinn. Að sjá hvernig hann bregst við tækinu er mikilvægt fyrir okkur. Hann er nú að læra að ganga með þetta.“