Átta argentínskir lögreglumenn hafa verið reknir úr starfi í kjölfar þess að hálft tonn af marijúana hvarf úr geymslum lögreglunnar. Lögreglumennirnir héldu því fram að mýs hefðu étið efnið en það þótti ekki mjög trúlegt að mati yfirmanna þeirra.
Marijúanað hafði verið haldlagt af lögreglunni og var geymt í vöruskemmu í Pilar. Fyrir tveimur árum sýndi úttekt að 6 tonn af marijúana voru í vörugeymslunni. Þegar ný úttekt var gerð nú í ársbyrjun kom í ljós að aðeins voru 5.640 kg af marijúana í geymslunni.
Grunur beindist strax að Javier Specia sem hætti störfum hjá lögreglunni á síðasta ári. Eftir því sem segir í umfjöllun The Guardian skilaði hann ekki af sér skýrslu um stöðu mála í vörugeymslunni þegar hann lét af störfum. Það var ekki fyrr en eftirmaður hans, Emilio Portero, kom til starfa að í ljós kom að marijúanað hafði rýrnað umtalsvert.
Specia og þrír aðrir voru nýlega færðir fyrir dómara vegna málsins. Þeir sögðu dómaranum að mýs hefðu étið marijúanað. Sérfræðingar lögreglunnar drógu þennan frambuð í efa og sögðu að stór hópur músa hefði ekki einu sinni getað étið svona mikið magn og auk þess myndu mýs ekki gera þau mistök að telja marijúana vera mat. Þá bentu sérfræðingar á að ef mýs hefðu étið efnið þá hefðu hræ margra músa fundist í vörugeymslunni.