Á síðasta ári velti tekjuhæsti Airbnbleigusali landsins 230 milljónum krónum en hann var með 46 gistirými í útleigu. Tíu tekjuhæstu íslensku leigusalarnir á Airbnb veltu 1,3 milljörðum á síðasta ári. Gisting í gegnum Airbnb tekur til sín stóran hluta af heildarfjölda gistinótta eða um 27 prósent á síðasta ári. Hótelin voru með 37 prósent og gistiheimili 12 prósent.

Þetta kemur fram í Morgunblaðinu í dag en þar er vitnað í nýja skýrslu Íslandsbanka sem verður kynnt í dag. Fram kemur að heildartekjur leigusala vegna útleigu á Airbnbíbúðum hér á landi hafi verið 19,4 milljarðar á síðasta ári og hafi aukist um 109 prósent frá árinu 2016. Gistinóttum fjölgaði um 2,1 milljónir á síðasta ári frá 2016.

Fram kemur að útleiga í Airbnb sé ekki lengur nær eingöngu bundin við höfuðbogarsvæðið því gistinætur á landsbyggðinni hafi verið 73 sinnum fleiri á síðasta ári en 2015. Þær voru 18.000 árið 2015 en 1,3 milljónir á síðasta ári.