Söguleg sátt hefur náðst í hræðilegu barnaníðsmáli þar sem félagsþjónusta sveitarfélagsins lét hjá líða að grípa inn í þrátt fyrir síendurteknar viðvaranir frá kennurum, leikskólakennurum og almenningi. Aðgerðarleysi sveitarfélagsins varð til þess að ofbeldið gat staðið yfir árum saman.
Málið vakti mikla athygli þegar það komst í hámæli í Danmörku. það kom upp í sveitarfélaginu Rebild á Norður-Jótlandi. Málið endaði með að maður var dæmdur í 12 ára fangelsi fyrir gróf kynferðisbrot gegn 6 börnum sínum og tveimur öðrum.
Jótlandspósturinn segir að í gær hafi náðst samkomulag á milli sveitarfélagsins og fulltrúa þolendanna í málinu um að sveitarfélagið greiði hverju barni mannsins, en hann á 10 börn, 450.000 danskar krónur í miskabætur vegna aðgerðarleysis sveitarfélagsins. Sveitarfélagið biðst um leið afsökunar á aðgerðarleysi sínu í málinu en þetta aðgerðarleysi varð til þess að ofbeldið stóð yfir árum saman.
Þetta eru hæstu bætur þessarar tegundar sem greiddar hafa verið í Danmörku til þessa. Áður hafði sveitarfélagið Tønder greitt fórnarlambi í einu umtalaðasta barnaníðsmáli sögunnar í Danmörku, Tønder málinu, 300.000 danskar krónur í miskabætur.
Í kjölfar samkomulagsins á milli Tønder og stúlkunnar tilkynntu landssamtök danskra sveitarfélaga að ekki væri heimilt að greiða bætur sem þessar úr bæjarsjóði án þess að dómsniðurstaða lægi fyrir. En samt sem áður hafa bæjaryfirvöld í Rebild ákveðið að gera það. Jótlandspósturinn hefur eftir framkvæmdastjóra sveitarfélagsins að þar á bæ hafi fólk ekki haft neinn áhuga á að láta börnin ganga í gegnum löng og erfið réttarhöld þar sem þau þyrftu að upplifa þetta allt á nýjan leik.