Leikskólaplássum verður fjölgað um 750 til 800, ungbarnadeildum verður fjölgað um helming í haust og fimm til sex nýir leikskólar verða byggðir á næstu árum á uppbyggingarsvæðum borgarinnar. Þetta kemur fram í tilkynningu frá Reykjavíkurborg þar sem víðtækar aðgerðir í leikskólamálum eru tíundaðar.
Í tilkynningunni segir að Reykjavíkurborg hyggist brúa bilið á milli fæðingarorlofs og leikskóla á næstu árum. Þetta er samkvæmt aðgerðaáætlun sem kynnt var í borgarráði í morgun en til þess þarf að fjölga leikskólaplássum um 750-800.
„Áætlunin gerir ráð fyrir að sjö nýjum ungbarnadeildum verði komið upp næsta haust auk þess sem fimm til sex nýir leikskólar verði byggðir á næstu árum. Þá verður gripið til margvíslegra aðgerða til að bæta aðstöðu á leikskólum og vinnuumhverfi leikskólakennara og annars starfsfólks. Tillögur um uppbyggingu leikskólanna byggja á vinnu starfshóps um verkefnið að brúa bilið milli fæðingarorlofs og leikskóla, sem borgarstjóri skipaði á vordögum 2016,“ segir í tilkynningunni.
Lagt er til að nýir leikskólar rísi í Úlfarsárdal, Vatnsmýri, Laugardal, Háaleiti, Vogabyggð og í Miðborginni.
„Á árunum 2022-2026 er síðan gert ráð fyrir að nýir leikskólar muni rísa í nýjum hverfum borgarinnar þar sem þörf krefur; einkum Bryggjuhverfi, Ártúnshöfða, Skerjafirði og Vogabyggð III-IV.“
Þá segir að aðgerðirnar sem kynntar voru í borgarráði í morgun feli enn fremur í sér að gripið sé til margvíslegra aðgerða til að bæta vinnuumhverfi á leikskólum borgarinnar.
„Þær byggja á tillögum starfshóps skóla- og frístundaráðs um nýliðun og bætt vinnuumhverfi leikskólakennara sem skilaði niðurstöðum í síðustu viku. Þar er m.a. lögð áhersla á aukið rými barna, fjölgun starfsfólks á elstu deildum, aukinn undirbúningstíma, fjölgun leikskólakennara og annars fagfólks, fjármagn til heilsueflingar og liðsheildarvinnu, aðgerðir til að efla móttöku nýliða m.a. með leiðsagnarkennurum og handleiðslu, ímyndarvinnu og kynningu á störfum á leikskólum.
Loks var samþykkt í borgarráði í dag tillaga um að auglýst verði 60 sumarstörf á leikskólum fyrir ungt fólk sem hefur áhuga á námi í kennslu- og uppeldisfræðum. Markmiðið er að kveikja áhuga ungs fólks á því að starfa á leikskólum og leggja stund á nám í leikskólakennarafræðum.“