Fjörutíu indverskum farandverkamönnum var rænt í kjölfar þess að hryðjuverkasamtökin ISIS náðu völdum í borginni Mosul í Írak sumarið 2014. Mennirnir voru við vinnu á háskólasvæðinu í Mosul þegar ISIS-liðar rændu þeim.

Aðeins einum manni tókst að flýja, Harjit Masih, en áður en að því kom var hann skotinn í fótlegginn. Óvíst var um örlög hinna en Masih varð þó vitni að því þegar nokkrir félaga hans voru skotnir í höfuðið.

Indversk yfirvöld vonuðu að einhverjir verkamannanna væru enn á lífi en þær vonir urðu að engu á dögunum þegar borin voru kennsl á jarðneskar leifar mannanna sem fundust í fjöldagröf í borginni.

Írösk yfirvöld höfðu fengið vísbendingar um að svæði skammt frá þorpinu Badush hefði verið notað sem fjöldagröf og fékkst það staðfest í fyrrasumar þegar byrjað var að hrófla við jarðvegi á svæðinu. Nú hefur það fengist staðfest, með aðstoð DNA-tækninnar, að líkamsleifarnar tilheyra 38 mannanna.

„Ég get sagt með fullri vissu að allir 39 eru dánir,“ sagði Sushma Swaraj, utanríkisráðherra Indlands. Ekki er búist við öðru en að kennsl verði borin á 39 manninn áður en langt um líður. Sushma sagði ljóst að mennirnir hefðu verið myrtir skömmu eftir að þeir voru handsamaðir.

Jarðneskar leifar mannanna verða fluttar til Indlands á næstu vikum.