Veiðiþjófar hafa löngum veitt fíla með það fyrir augum að ná fílabeinum, eða svokölluðum skögultönnum, sem hægt er að græða fúlgur fjár á. Er nú svo komið að fílar eru í útrýmingarhættu og það víðar en í Afríku.
Ný rannsókn vísindamanna í Asíuríkinu Mjanmar, eða Búrma, leiðir í ljós að veiðiþjófnaður þar er stórt vandamál þvert á það sem áður var talið. Veiðiþjófnaður á skögultönnum Asíufíla var áður ekki talinn stórt vandamál, einfaldlega í ljósi þess að tennurnar vaxa einungis á um 25-30 prósentum karldýra. En það er eftir fleiru að slægjast fyrir veiðiþjófa.
GPS-búnaði var komið fyrir á 19 villtum Asíufílum og var fylgst með ferðum þeirra í þrjú ár. Innan við tveimur árum síðar voru allir fílarnir dauðir og leiddi athugun í ljós að þeir höfðu orðið veiðiþjófum að bráð. Í ljós kom að skipulögð glæpasamtök sóttust eftir skinninu á þeim til að selja á svörtum markaði. 40 aðrir fílar fundust dauðir á svipuðum slóðum.
National Geographic fjallaði um niðurstöðurnar en í greininni kom fram að veiðiþjófar fengju sem nemur tæpum 40 þúsund krónum fyrir fílaskinn á svörtum markaði í Kína. Þar er skinnið notað í óhefðbundnar lækningar rétt eins og fílabeinið.
Asíufíllinn hefur átt erfitt uppdráttar undanfarna áratugi, meðal annars vegna aukinnar ásóknar mannsins í landsvæði sem fílarnir hafa notað öldum saman. Niðurstöður þessarar tilteknu rannsóknar draga upp enn dekkri mynd af stöðu fílsins, sérstaklega í ljósi þess að allir fílar eru skotmark veiðiþjófa, en ekki bara þeir sem hafa skögultennur.