Ungur söngvari að nafni David Francisco sló í gegn í áheyrnarprufum sjónvarpsþáttanna American Idol nú á dögum. Það var þó ekki aðeins heillandi og einlægur flutningur hans sem heillaði dómnefndina upp úr skónum.
Áður en David hóf flutning sinn sagði hann dómurunum sögu sína. Árið 2016 flutti hann til Nashville í von um að vera uppgvötvaður sem tónlistarmaður. Ekki löngu eftir það lenti hann í alvarlegu bílslysi og lamaðist fyrir neðan mitti. Hann gekkst í kjölfarið undir stífa endurhæfingu og notast í dag við hækjur en læknar höfðu áður tjáð honum að hann myndi sennilega aldrei geta gengið á ný.
Í áheyrnarprufunni flutti David hinn sígilda slagara Stevie Wonder „Isn´t she lovely“ á meðan eiginkona hans, Kristi Platillero.beið á hliðarvængnum með tárin í augunum.
„Ég er bara að missa mig hérna,“ sagði söngkonan Katy Perry sem situr í dómnefndinni en tárin flæddu niður kinnar hennar á meðan hún hlýddi á flutninginn.
Lionel Richie átti sömuleiðis erfitt með að halda aftur af tilfinningum sínum og í lokin reis hann úr sæti sínu og tók utan um David.
„Þú ert okkur öllum innblástur.“