Maðurinn sem grunaður er um hrinu sprengjuárása í borginni Austin í Texas er látinn. Að því er bandarískir fjölmiðlar greina frá voru lögreglumenn komnir á slóð hans í nótt. Áður en hann var handtekinn sprengdi maðurinn sig í loft upp í bifreið sinni.

Síðastliðinn mánuð hafa fjórar heimatilbúnar sprengjur verið sprengdar í borginni. Tveir ungir karlmenn hafa látist í árásunum og fjórir slasast.

Lögregla segir ljóst að sprengjurnar hafi verið hannaðar með það í huga að valda sem mestum skaða. Voru þær meðal annars búnar nöglum og málmbrotum sem þeyttust í allar áttir þegar sprengjurnar sprungu.

Brian Manley, lögreglustjóri í Austin, sagði á blaðamannafundi í morgun að liðsmenn sérsveitarinnar hafi skotið á manninn sem var 24 ára. Þegar ljóst var að hann væri umkringdur sprengdi hann sig í loft upp sem fyrr segir.

Manley sagði á blaðamannafundi að íbúar ættu að vera áfram á varðbergi því ekki sé útilokað að maðurinn hafi búið til fleiri sprengjur og komið þeim fyrir.

Í gær gaf lögregla til kynna að ekki væri útilokað að um hatursglæp væri að ræða. Til marks um það voru pakkarnir stílaðir á fólk sem tilheyrir minnihlutahópum en sjálfur var maðurinn hvítur á hörund.

Þann 12. mars síðastliðinn lést 17 ára piltur, Draylen Mason, þegar pakki, sem skilinn var eftir á verönd við heimili hans, sprakk. Móðir hans slasaðist alvarlega. Nokkrum klukkustundum síðar slasaðist 75 ára kona eftir að pakki, sem skilinn hafði verið eftir við heimili hennar, sprakk.