Það má að vissu leyti segja að söguleg tíðindi eigi sér stað í dag þegar danska verslunarkeðjan Nemlig.com byrjar að selja gúrkur frá Íslandi. Líklegast hefði engum dottið í hug fyrir ekki svo löngu að Íslendingar færu að flytja grænmeti út til meginlands Evrópu en nú er sú stund runnin upp.

Í fyrstu sendingunni eru 4.608 gúrkur svo ljóst er að fólk verður að hafa hraðar hendur ef það vill kaupa íslenska gúrku. Við athugun blaðamanns á vöruúrvalinu í netverslun Nemlig.com nú í morgun sést að íslenskar gúrkur kosta 12 danskar krónur stykkið sem er sama verð og er á dönskum gúrkum. Gúrkur frá Spáni kosta 5 danskar krónar stykkið og lífrænt ræktar gúrkur frá Spáni kosta 8 danskar krónur stykkið. Íslensku gúrkurnar eru því vel samkeppnishæfar miðað við þær dönsku að minnsta kosti.

Á vef Nemlig.com kemur fram að íslenskar gúrkur beri með sér bragðið af hinni sérstöku íslensku náttúru. Um sjálfbæra ræktun sé að ræða þar sem ekkert skordýraeitur er notað. Gúrkurnar séu vökvaðar með hreinasta vatninu sem völ sé á í náttúrunni. Það sé síað mjög hægt því vatnið leki hægt og rólega niður í gegnum jarðveginn á íslenska hálendinu.

Þá er tekið fram að flutningurinn á gúrkunum til Danmerkur sé sjálfbær því Íslendingar flytji meira inn en út og því sé pláss, sem væri hvort sem tómt á leiðinni frá Íslandi, nýtt undir gúrkurnar og það bæði í skipum og flugvélum.