Trommuleikari Motley Crüe, Tommy Lee, stendur fast á þeim ásökunum sínum að sonur hans með Pamelu Anderson, Brandon Lee, hafi ráðist á hann. Ósætti kom upp á milli feðganna eftir að Pamela ræddi ofbeldi Tommy í hennar garð á meðan á hjónabandi þeirra stóð í sjónvarpsþætti Piers Morgan á dögunum.
Á meðan á stormasömu hjónabandi Anderson og Lee stóð var hann dæmdur í sex mánaða fangelsi fyrir heimilisofbeldi.
Á þessi upprifjun Pamelu að hafa farið illa í Tommy Lee og tjáði hann í kjölfarið óánægju sína á Twitter. Sonurinn var ósáttur við þau viðbrögð föður síns og segir Tommy að Brandon hafa kýlt hann í andlitið með þeim afleiðingum að hann missti meðvitund. Nú hafa fjölmiðlar ytra staðfest að Tommy ætli að fara alla leið með málið og hann hyggist kæra Brandon.
Brandon sendi tilkynningu til fjöllmiðla stuttu eftir upphaflega atvikið þar sem hann sagði að þetta væri allt saman sorglegt mál sem fyrst og fremst væri hægt að skrifa á alkóhólisma föður síns. Faðir hans þvertekur fyrir þá staðhæfingu og segist fá sér einstöku sinnum í glas sem hljóti að vera í lagi, hann hafi unnið linnulaust í þrjátíu ár og eigi fullkomlega skilið að lyfta sér upp stöku sinnum núna eftir að hann settist í helgan stein.