Það eru ýmsar ástæður fyrir því að fólk ætti frekar að sitja við glugga en til dæmis við ganginn þegar ferðast er með farþegaþotum. Vísindamenn hafa nú varpað ljósi á enn eina ástæðuna.

Í rannsókn sem vísindamenn við Emory University í Atlanta í Bandaríkjunum framkvæmdu eru farþegar sem sitja við glugga síður líklegri en aðrir farþegar til að grípa pestar; kvef eða flensu til dæmis, frá öðrum farþegum.

Í stórum farþegaþotum koma stundum hundruð farþega saman og þegar nándin er mikil aukast líkurnar á því að smitast af ýmsum óværum, eins og gefur að skilja.

Það var flugvélarisinn Boeing sem fjármagnaði rannsóknina sem var nokkuð umfangsmikil. Komið var fyrir mælibúnaði í vélum fyrirtækisins og safnaði þessi búnaður meðal annars mjög nákvæmum upplýsingum um loftgæði um borð –  og hvað miður skemmtilegt leyndist í loftinu, vírusar til dæmis. Þá voru ferðir farþega innan vélarinnar, til dæmis á klósett, skrásettar sem og aðrar upplýsingar, til dæmis þegar farþegar hóstuðu eða hnerruðu.

Niðurstöðurnar voru á þá leið að besta leiðin til að forðast smit væri að sitja við gluggann og helst ekki standa upp.

Tekið er fram að rannsóknin, sem gerð var fyrir fimm árum, hafi haft sínar takmarkanir. Til marks um það var farið í samtals 10 flugferðir en átján algengar tegundir vírusa, sem geta valdið kvefi og flensu, fundust ekki í neinni vélinni. Þó, miðað við loftstreymi og allar fyrirliggjandi upplýsingar, telja vísindamenn sig geta sagt með vissu að gluggasætið er best til að forðast pestir.

Niðurstöður rannsóknarinnar voru birtar nýlega í tímaritinu Proceedings of the National Academy of Sciences.