Sívar Sturla Bragason lést í gærkvöldi, 58 ára að aldri. Fréttablaðið greinir frá andláti Sívars og vitnar til bókar systur hans, Ásdísar Höllu Bragadóttur, Tvísaga sem kom út fyrir tveimur árum. Þar segir að Sívar hafi ungur verið sendur á Silungapoll en þar var unglingaheimili á vegum ríkisins.

Dvöldu um 950 börn á Silungapolli og eins og svo mörg börn sem þangað voru send bar Sívar þess aldrei bætur.

Ásdís Halla minnist bróður síns með þessum orðum:

,,Okkar mein er sársaukinn sem gengur mann fram af manni, kynslóð eftir kynslóð. Alkóhólisminn er sjúkdómur sársaukans.

Þessi orð Sívars bróður koma nú upp í hugann en hann kvaddi þetta líf í gærkvöldi. Nú eru bræðurnir, hann og Sonny, sameinaðir á ný – og vonandi á betri stað sem gefur öllum börnum jöfn tækifæri.“