Sævar Helgi Bragason, rithöfundur og ritstjóri Stjörnufræðivefjarins, segir að vorið komi í dag og það ekki mínútu síðar en klukkan 16.15.
„Í dag reis sólin nákvæmlega í austri og sest nákvæmlega í vestri og er beint fyrir ofan miðbaug,“ segir Sævar Helgi á Facebook-síðu sinni. Hann bendir á að dagur og nótt séu ekki alveg jafn löng – við njótum þó meiri birtu en myrkurs, mörgum til ánægju. Full ástæða sé til að óska fólki gleðilegs vors.
Í umfjöllun um málið á Stjörnufræðivefnum er bent á að á sama tíma og vorjafndægur er á norðurhveli Jarðar hefjist haust á suðurhvelinu þegar sólin færist norður yfir miðbaug himins. Þá er bent á að norðurljós séu algengari í kringum jafndægur, eða að meðaltali tvöfalt algengari en í kringum sólstöður. „Mestar líkur eru á að norðurljós sjáist í mars/apríl og september/október.“
„Enginn veit í raun hvers vegna norðurljós eru tíðari um jafndægur en líklega hefur það eitthvað að gera með möndulhalla Jarðar miðað við sólina á þessum tíma.“
