Dómsmála- og innflytjendaráðherra Noregs, Sylvi Listhaug, hefur sagt af sér embætti vegna ummæla sem hún lét falla um norska Verkamannaflokkinn.
Eftir vafasöm ummæli hennar á Facebook stóð til að bera upp vantrauststillögu á norska þinginu en áður en að því kom sagði hún af sér embætti.
Ummælin sem um ræðir sneru að því að Verkamannaflokkurinn tæki hagsmuni hryðjuverkamanna fram yfir hagsmuni norsks almennings. Ummælin þóttu mjög óheppileg, sérstaklega í ljósi þess að hryðjuverkamaðurinn Anders Behring Breivik skaut tugi ungliða Verkamannaflokksins til bana sumarið 2011.
Listhaug útskýrði afsögnina þannig að hún vildi ekki að málið myndi draga dilk á eftir sér fyrir flokk sinn, Framfaraflokkinn. Kvaðst hún hafa tekið þessa ákvörðun ein og óstudd og án þrýstings frá samstarfsflokkum Framfaraflokksins í norsku ríkisstjórninni.