Breska blaðið Mirror hefur tekið saman lista yfir flottustu búninga þeirra þjóða sem taka þátt í heimsmeistaramótinu í fótbolta sem fram fer í Rússlandi í sumar. Íslenski búningurinn er rétt undir meðallagi fallegur, ef marka má sérfræðinga Mirror.
Átján þjóðir af þrjátíu og tveimur hafa opinberað búninga sína og er Ísland í þeim hópi. Að mati Mirror á Ísland tólfta fallegasta búninginn af þeim átján sem hafa litið dagsins ljós.
Mirror segir að Ísland fái ákveðin bónusstig fyrir flotta kynningu á búningnum og tekið er fram að Ísland sé að taka þátt í HM í fyrsta sinn. Rauði og blái liturinn á erminni vekur hrifningu sérfræðinga Mirror og segir að búningurinn muni eflaust sóma sér vel undir íslenska víkingaklappinu sem mun óma um allt Rússland í sumar. Fleiri orð eru svo sem ekki höfð um íslenska búninginn sem er sem fyrr segir í tólfta sæti af þeim átján sem kynntir hafa verið.
Heimamenn í Rússlandi eiga ljótasta búninginn af þeim sem hafa verið kynntir. Búningurinn þykir ekki beint frumlegur eða eftirminnilegur. Rússar séu í raun alltaf í sama búningnum, eða því sem næst.
Fallegasta búninginn eiga Nígeríumenn sem eru með okkur Íslendingum í riðli. Um er að ræða Nike-búning sem þykir einstaklega vel heppnaður. Er tekið fram í grein Mirror að erfitt sé að halda ekki með liði sem leikur í svo fallegum búningi. Á eftir Nígeríu yfir fallegustu búningana koma Kólumbía og Belgía í öðru og þriðja sæti.