Kona sem keyrði án ökuskírteinis reyndi að sleppa við sekt með því að þykjast vera teiknimyndapersónan Hómer Simpson úr sjónvarpsþáttunum fornfrægu um Simpson-fjölskylduna.
Konan var stöðvuð við hefðbundið umferðareftirlit í Buckinghamskíri í Bretlandi í síðustu viku. Hún var ekki með ökuskírteinið á sér og lét því lögregluþjóninn fá ökuskírteini með mynd og nafni Hómers.
Bílinn var gerður upptækur og konan á yfir höfði sér sekt.
Lögreglan í Buckinghamskíri greindi frá þessu skondna atviki á Fésbók með því sem Hómer myndi segja í slíkum aðstæðum:
„D‘oh!“