„Ég er fórnarlamb hefndarkláms“ – Segir að reynt hafi verið að kúga út úr sér fé
„Ég er fórnarlamb hefndarkláms. Það var verið að reyna að kúga mig til þess að borga gjald til þess að sleppa við þetta en ég neitaði. Þetta eru afleiðingarnar,“ segir Árni Gils Hjaltason í samtali við DV. Í vikunni var 5–6 sex kynlífsmyndböndum af Árna Gils lekið á klámsíðuna alræmdu Pornhub í kjölfar þess að hann neitaði að láta undan áðurnefndum kúgunum. Skjáskot úr einu myndbandi bárust til DV.
Að sögn Árna fékk hann fljótlega að vita hvað hefði gerst en þá var skaðinn skeður. „Ég tilkynnti myndböndin í hvelli og endaði með að senda upplýsingar á fyrirtækið um að þetta væri ekki með mínum vilja. Ég þurfti að sanna hver ég væri með myndum af vegabréfi og í kjölfarið voru myndböndin tekin út,“ segir Árni. Þá hafði eitt myndbandið fengið um þrjár milljónir áhorfa að sögn Árna og hafði hann orðið fyrir margs konar áreiti þess vegna. „Ég fékk meðal annars tölvupóst frá Japan þar sem mér var boðið hlutverk í þarlendri klámmynd,“ segir Árni.
Myndböndin voru af margvíslegum kynlífsathöfnum Árna og þáverandi ástkonu hans en hún tók myndböndin upp. Þau eru óskýr að sögn Árna en í einu þeirra sést þó greinilega í andlit hans. Árni vinnur nú í því að fá myndböndin fjarlægð af klámsíðunni, sem er sú vinsælasta í veröldinni, en hann hyggst ekki leita til lögreglunnar um aðstoð. „Ég treysti þeim ekki. Lögreglan hefur komið ótrúlega illa fram við mig og notar allt gegn mér,“ segir Árni.
Málið sem Árni vísar í er hnífstunguárás í Breiðholti fyrir rúmu ári. Nokkrum mánuðum síðar var Árni dæmdur í fjögurra ára fangelsi fyrir morðtilraun. Í kjölfar dómsins stigu Árni og faðir hans, Hjalti Úrsus Árnason, fram í fjölmiðlum og sögðu að réttarmorð hefði verið framið á Árna. Hann hafi ekki fengið sanngjarna málsmeðferð og engin sönnunargögn bendluðu hann við hinn meinta glæp. Málið vakti mikla athygli í samfélaginu og var því að sjálfsögðu áfrýjað til Hæstaréttar. Hæstiréttur kvað upp þann úrskurð að senda málið aftur til héraðsdómstóls og þar með var það úr sögunni að sögn feðganna. „Við erum að undirbúa stærstu skaðabótakröfu Íslandssögunnar,“ sagði Hjalti Úrsus vígreifur í viðtali í kjölfar niðurstöðunnar.
Árni Gils segir farir sínar ekki sléttar af samskiptum hans við lögreglu. „Þeir hafa komið illa fram við mig og ég treysti þeim ekki,“ segir Árni. Hann var í slæmu andlegu ástandi eftir að hafa verið tæplega 300 daga í gæsluvarðhaldi í kjölfar ofangreinda dómsins. „Þetta voru 300 dagar af svefnleysi og með það yfir höfðinu á sér að ég væri að fara að sitja lengi inni. Þegar ég losnaði fór ég að leita mér geðhjálpar en þá lenti ég aftur í klóm lögreglunnar,“ segir Árni. Vísar hann í sérsveitarmenn sem miðuðu á hann byssum en DV fjallaði um uppákomuna þann 13. desember síðastliðinn.
Í fréttinni sást stutt myndskeið sem Árni tók upp sjálfur og en þar sjást sérsveitarmenn vopnaðir rafbyssum umkringja hann. „Ég spurði þá hvort að ég væri handtekinn en þeir neituðu því. Þá sagðist ég vera frjáls maður og ætla að yfirgefa svæðið,“ segir Árni. Hann hafi reynt að komast í burtu en hafi rekist í byssu sérsveitarmanns. „Þá miðaði hann byssunni og öskraði á mig að ég ætti að stoppa annars myndi hann skjóta, þetta endurtók hann í sífellu,“ segir Árni. Í kjölfarið segist hann hafa verið í gíslingu lögreglu í rúmar 20 mínútur. „Ég er búinn að reyna að fá upptöku úr öryggismyndavél af þessu atviki en hún hefur ekki fengist. Ég ætla samt ekki að gefast upp, framkoma lögreglu í minn garð mun koma upp á yfirborðið að lokum,“ segir Árni Gils.
