Saksóknarar á Norður-Sjálandi í Danmörku hafa ákært 22 ára karlmann frá Frederikssund fyrir tilraun til tryggingasvindl með því að kveikja í báti sínum á Roskilde Fjord við Sjáland í október á síðasta ári. Maðurinn er ákærður fyrir brot gegn grein 180 í hegningarlögunum en allt að lífstíðarfangelsi liggur við brotum á þeirri grein.

Eftir því sem segir í umfjöllun BT um málið þá er ákæran þannig orðuð að ákæruvaldið telur hinn ákærða sekan um að hafa orðið vini sínum að bana þrátt fyrir að hann hafi ekki ætlað sér það í upphafi. Fram kemur að þegar hinn ákærði hafði hafist handa við fyrirætlun sína hafi hann „áttað sig á að líf annarra var í bráðri hættu“.

Maðurinn er einnig ákærður fyrir að hafa verið með hass í fórum sínum í Helsingør fangelsinu og að hafa verið með 14 kúlur í 9mm skammbyssu í fórum sínum. Við þetta bætist síðan ákæra fyrir að hafa hótað fjórum fangavörðum líkamsmeiðingum.

Eftir að eldur kom upp í báti hins ákærða í kjölfar sprengingar hoppaði vinur hans, hinn 24 ára Tavab Khoshival, í sjóinn. Hann var íklæddur gölluðu björgunarvesti. Dýpið á þessum slóðum er um sjö metra. Khoshival drukknaði og fannst lík hans tveimur vikum síðar.

Samkvæmt ákærunni voru vinirnir á siglingu um Roskilde Fjord þegar hinn ákærði kastaði logandi klút, sem hann hafði vætt í bensíni, á vél bátsins. Þá varð sprenging og í kjölfar hennar hoppaði Khoshival í sjóinn.